Kum 10 lai a liam ve ta

              Dt 24^th October 2012 a lo inher chhuah meuh chuan ka nupui duhtak K Lallawmsiami nena Kohhran leh Khawtlang hriatpuia Pathian hmaa kut insuiha kan inneihna ni champha kum 10-na a lo thleng ve leh ta reng mai. Kum dang leh ni dangah chuan chuti teh ualin ka ngaipawimawh lem lova, a chang phei chuan ka theinghilh fo va, nikum phei kha chuan sikul naupang hruaiin mahni inlum chhuahsanin ka zin chhuak daih anih kha. Kumin erawh kumbi nei bik anih vang pawh ani mahna, ka hre reng lo thei bik lo. Kum 10 lek liamta phei kha chu a ni a, rei pawh a la ni lem lo, mahse hmanni lawk emaw ka tih chhungin kum 10 bi khatna chu a lo inher liam ve leh ta mai chu a nia. 

               Tunlai ah mi kan fing a, kan inchhiar zauva, inneihna pawh simple taka tiha insenso pawh tihhniam theih dan a awm a ni tih kan hria. Sap ho tihdan thikin mitlemte te hmaa inneihna thutiam chham ve mai te pawh kan duh rum rum. Mahse kan lo thu lo vei vei khawp mai. Pi leh pu, chhungkhat laina te'n hetiang ngaihdan hi chu a theh thal rang mai mai asin. Hautak lo leh holam taka tih liam mai mai hi an phal teuh lo.

               Hetia inneih champha kum 10 a lo thlen takah chuan a hmaa ka lo ngaihnep viau ang kha a lo ni miah lo. Rilruah thil tam tak a lo lut a, khatih hunlaia thil thlengte mitthlaah a rawn lang zut zut mai. Khawnge thup chin tlem tlem nei chungin ka'n ziak ang e.

                Kan inneih sawmna lehkha tur ka buaipui nia ka buai zia te, a man tlawm thei ang ber leh simple thei ang bera Gov’t Press-a ka siamtir lai te, ka nupui tur nena kan pahniha kan sem dun lai te kha mitthla ah a cham reng mai. Mi tihdan anga “Khawngaihtakin in veng chhung ami hi chu min lo sem sak ta mai che u” tia mi kuta a hlawma dah ve mai lovin, keimahni ngei ina kan han sem tiah tiah mai te kha, mitthlaah a cham reng mai.

              Kan innneih hma ni chiaha kan buai zia te, chhung leh khat, mitlawmngai tak tak te’n min rawn tanpui a, theihtawpa hna min rawn thawhpui te kha, ka theihnghilh thei ngai lovang. Khami nia kan buai zia te, zan lama zanrei tak thlenga insingsaa kan buai zia te, a then Biakin cheia zan dar khat thlenga an meng te kha ka mitthla a’n a cham reng mai. Kan inpeih fela mu tura khum lam ka pan meuh chuan zinglam dar hnih vel a ri tawh.  Mite hi an lo va tlawmngai tak em.

                 Inneih dar an khawng ri bal bal a, chu dar chu ka pual liau liauva khawn rik a ni. Mihring kan dam chhung hian kan puala dar khawn rik theihna chance vawi hnih kan nei a, chu chu kan inneihni ah leh kan thihni ah a ni. Inneihni-a kan puala dar khawn rik chiah hi kan hriat ve theih a ni a, a hluin a ropui bik ngei mai. Chutia ka pual liau liau, kei leh ka nupui ni mai turte pual liau liauva dar khawn a rik ral ral lai chuan kei leh ka thian Hmachhuana Bawitlung te chu Biakin ah inti thupui fun takin kan lo thu ran tawh a. Suit nena insuih smart khat ve em em mai tih takah ka khawr tut mai. Hmabak a kovin a phurawm a, a huphurhawm bawk. Kan lo hah rimtawng tawh a, zan tam mutmu ka lo tuah fumfe lo bawk nen, rinloh takin kan ham bei bei mai ang tih hlauhawm tak a ni. Mi zawng zawng mit ka chungah a fu thuap dawn tih ka hre lawksa bawk a, chetsual a hlek a langsar dawn bawk a, fimkhur a ngai kher mai.

               Inkhawm tantir lamah zavaia hla saa mipuite nena kan ding vek, zai zawhah mipui an thu ang a, keini chu kan ding tlang ang. Chutah le, hlauh ang ngeiin mipui thut rualin ka’n thu ve thut mai anih kha, ka tho rang ngei mai. Mipui lam an ri nghal huk bawk. Pulpit hmaah inneihna thuthlung, lehkhabupuia kan ziak zo, kan let leh tur, monu leh a thiannu nena a ruala muangchanga let phei leh tur kha, kei leh ka thianpa chuan chak tawkin kan han kalsan hmak mai anih kha. Mipui lampang an ri leh nghal huk mai. Chutah inneihna thutiam kan chham dawna Pastorin “I intiam thei em” a tih tuma, “Tiam thei e” tia chhan tur kha, tum loh deuhvin “Aw” ka ti tawi tup bawk. Khang kha chu engmah a ni lo, a liam ve mai.. Tlemin ka lai ve deuh nge, thlalak lai hmui ka lo pet ruh deuh thin erawh kha chu, rinaiin thlalak hi a in change mawh tawh sia, a pawi rei ta anih hi.  Tlai lam a nih meuh chuan ka neck-tie kha ka nghawngah a in vet tawh lo, ka chalah a lo invet, min pawhthlak tir rang ngei mai......... 

               Kan inneihnia zaipawl pathum lai, Chanmari Bial Zaipawl, Electric Unit Zaipawl leh BHSS students zaipawl zaite kha, kan pual liau liauva  mawi taka an han zai te kha a va ropui tak em. Min duhsaka, kan inneih min lawmpui tura mahni hna tlansana mi khati zozai, Biakin thutna zawng zawng khat vek khawpa an lo kal te kha a ropui ka ti. Kei takngial hi tunge maw ka nih a, mahni hna tul kalsan a khaw hla tak tak atanga kan inneihna hmang tura min rawn pan vang vang le ka ti thin. Chutah present chi hrang hrang, hlu tak tak kan la dawng zui. Kan inneihnia ka hnathawhpui, ka aihnah phahpuite pawr em em zia leh min tawiawm that em em zia te, khawtlang nula leh tlangval te'n kawng hrang hranga min puih dan te kha theihnghilh a harsa ngei mai.


                 Hun leh ni a inher liam ve zel a, hmanni lawk emaw ka tih chhungin kan ti nek nek a, kum 10 chu a liam ve leh ta reng mai. Nupui-pasal inneih hi tih namai a lo ni lo. A kawng hi nuam purhin lang mahse, a phenah hian thil tam tak inthup a awm thin. Nulat tlangval lai kha chuan a parmawina chauh kha kan tem a, nupaa insiam hnu hi chuan a parmawina zawng zawng bakah a hling zum leh a kha zawng zawng nen tem vek a ngai tawh thin. Nulat tlangval lai hian kan miziaa a thalo lai leh a mawi lo lai te kan thup bo hram hram a, kan duhawmna lai ber zel kan par chhuahtir thin. Chutiang ve vea intawnga innei theuh kan ni a, nupaa insiam hnu meuh chuan engmah thup theih ni tawh hek lo, inneihna hi risk a lo sang khawp mai. Nupa tluang taka innei reng thei tur chuan inhmangaihna te, induhsakna te, inchawimawitawnna te, inhriatthiamna te, inngaihsakna te a awm tur a ni a, tin a pawimawh ber chu rinawmna hi a ni bawk. Nupa nunkawng hi a rualrem reng lova, chuvangin nunkawng bumbohva kal chang pawha inthurual taka kaldun thiam hi, harsa thin hle mahse a lo pawimawh khawp mai.